پەسەندە كە پیاو خۆی جوان بكات بۆ ئافرەتەكەی، هەروەك ئیبن عباس(رضي الله عنه) دەفەرمووێ‌: ((من خۆم جوان دەكەم بۆ خێزانم هەروەك ئەو بۆ من خۆی جوان دەكات، نامەوێت من هەموو هەقی خۆم لەو وەربگرم و هەقی ئەویش لەسەر من بمێنێ‌)). چونكە خوای گەورە فەرموویەتی: [وَلَهُنَّ مِثْلُ الَّذِي عَلَيْهِنَّ]البقرە: 238.

ئیمامی قورتبی دەربارەی گووتەكەی ئیبن عباس(رضي الله عنه) دەلێ‌: خۆ جوان كردنی پیاوان لە بارێك بۆ بارێكی دەگۆڕێ‌ ، هەندێ‌ خۆ ڕازاندنەوە شیاوە بۆ گەنجان و هەندێكی تر بۆ پیرەكان، بەگوێرەی شوێن وجێگەش بەهەمان شێوە دەگۆڕێ‌. دەربارەی پۆشاكیش بەهەمان شێوەیە، مەبەستیش بریتیە لە ڕێك وپۆشتەیی ودڵی ئافرەتەكەی پێ‌ خۆش بكات. هۆكارەكانی ڕازاندنەوەش بریتین لە: بۆن، سیواك، نینۆك كردن، قژ ڕێكخستن، لابردنی پیسی، كە كۆمەڵی زانایان پەسەندیانە.

ئەنەسی كوڕی مالیك(رضي الله عنه) ، دەڵێ‌ پێغەمبەری خوا (صلى الله عليه وسلم) دەفەرمووێ‌: ((لە دونیا ئافرەت وبۆنی خۆشم لا خۆشەویست كراوە ، نوێژیش بیلبیلەی چاومە)).

فەرموودەكە وا دەگەیەنێ‌ كەوا پیاوان دەبێ‌ جۆری عەترو بۆنەكانیان ڕەنگی نەبێ‌ بەڵام بۆنی زۆر بێ‌ وەك : میسك و عەنبەرو عودو عەتر، بە پێچەوانەی ئەوەی ئافرەتانە كە دەبێ‌ بۆنی كەم بێ‌ وڕەنگی زۆر بێ‌ وەك: زیباد وعەبیر.